ණය සහන සලසන කතා “මාධ්‍ය සංදර්ශනයක්” විතරයි….
රට මුහුණ දී සිටින අර්බුදයට, සාර්ථක ලෙස මුහුණ දී ඇති බවට අග්‍රාමාත්‍යවරයා විසින් ජාතිය අමතා විශේෂ ප්‍රකාශයක් කර දිනක් ගතවීමටත් මත්තෙන්, රාජ්‍ය සේවකයන් නියෝජනය කරන වෘත්තිය සමිතියක් විසින් අනාවරණය කර ඇති පරිදි ආණ්ඩුව විසින් ප්‍රසිද්ධියට පත් කොට ඇති සහන නිසියාකාර ක්‍රියාත්මක වන්නේ නැත.
අගමැතිවරයා වෙත යොමු කරන ලද ලිපියක් මගින් ගුරු සංගමයක් පෙන්වා දී ඇත්තේ කොරෝනා වෛරස් තත්වය හමුවේ රාජ්‍ය සේවකයන්ගේ අප්‍රේල්, මැයි මාසවල ණය වාරික අයකර නොගැනීමට ආණ්ඩුව ගත් තීරණය මේ වන විට “හුදු මාධ්‍ය සංදර්ශනයක්” බවට පත්ව ඇති බවයි.
අප්‍රේල් මස වැටුපෙන්ද රාජ්‍ය සේවකයන්ගේ ණය වාරික අයකරගෙන තිබීම ඉතාමත් කණගාටුදායක තත්වයක් බව එම ලිපියේ සදහන්ය.
ණය වාරික අයකර නොගැනීමට නම් ලිපි මඟින් ඉල්ලීම් කළ යුතු බවට බැංකු විසින් දැනුම් දී ඇතත් ඇඳිරි නීතිය බල පැවැත්වෙන කාලය තුළ ලිපි ෆැක්ස් කිරීමට පහසුකම් නොමැති බව ඒකාබද්ධ ගුරු සේවා සංගමයේ ලේකම් සංජීව බණ්ඩාර අප්‍රේල් 8 දින අගමැතිවරයාට යොමු කළ ලිපියේ සදහන්ව තිබේ.
ලිපි ඊමේල් කිරීමට අදාළව ගත්තද data card එකක් වුව මිලදී ගැනීමට නොමැති වටපිටාවක් පැවතීමත් තුළ මෙවැනි ප්‍රයෝගික නොවන යෝජනාවල අරමුණ ණය වාරික අයකර නොගැනීමද නැත්නම් කෙසේ හෝ අයකර ගැනීමද යන ප්‍රශ්නය ඇසීමට සිදුවන බව එහි තව දුරටත් සදහන්ය.
අන්තර් විශ්වවිද්‍යාල ශිෂ්‍ය බල මණ්ඩලයේ හිටපු කැඳවුම්කරුවෙකුද වන සංජීව බණ්ඩාර අගමැතිවරයාට වැඩි දුරටත් දැනුම් දී ඇත්තේ මාස දෙකක කාලයක් සදහා ණය වාරික අයකරගැනීම අත්හිටුවීමට අණ්ඩුව ගත් තිරණය අදාල වන්නේ ලක්ෂ 10 යට වඩා අඩු ණය ලබාගත් අය සඳහා පමනක් වීමද බරපතල ගැටලුවක් බවයි.
“මන්දයත් මෙවැනි සහනයක් ලබාදිය යුත්තේ පවත්නා තත්ත්වය යටතේ ණය ගෙවීමේ නොහැකියාව සලකා නම් ලක්ෂ 10ට වඩා වැඩි ණය ගත් අය සඳහාද එම තත්ත්වය පොදුය.”
“ලබාගත් ණය ප්‍රමාණය වැඩිවන විට වාරිකයේ අගයද වැඩිවන අතර වැටුපෙන් ඉතිරිවන ප්‍රමාණය තව තවත් අඩුවීම හේතුවෙන් ඔවුහු පත්වන දැඩි අසීරුතාව තේරුම්ගැනීමට ආණ්ඩුව සමත් විය යුතුය.”
බොහෝ රාජ්‍ය සේවකයන්ට සිය වැටුප අවශ්‍යතා ඉටුකරගැනීමටවත් ප්‍රමාණවත් නොවන අතර ඔවුන්ට විවිධ ණය මත යැපීමට සිදුව ඇති බව පෙන්වා දෙන සංජීව බණ්ඩාර, සිය ලිපිය මගින් අවධාරණය කර ඇත්තේ “විශේෂයෙන් ගුරු විදුහල්පතිවරු ගත්විට ඔවුන්ට ලැබුණු සොච්චම් වැටුපෙන් ජීවත්වීම කොහොමත් අසීරු තත්ත්වයක පැවති අතර ටියුෂන් ඇතුළු අමතර ආදායම් මත යැපීමට ඔවුන්ට ද සිදුවිය…” යනුවෙනි.
මේ සියලු කරුණු සලකා ණය වාරික අත්හිටුවීමට ගෙන ඇති තීරණය සියලුම ණයවලට අදාලව ක්‍රියාත්මක කරන ලෙසත්, ලිපි මඟින් ණය වාරික අයකර නොගැනීමට ඉල්ලීම් කළ යුතුයැයි වැනි කොන්දේසි පැනවීම්වලින් තොරව සියලු දෙනාගේ ණය වාරික අයකරගැනීම වහාම අත්හිටුවීමට කටයුතු කරන ලෙසත්, අයකරගත් වාරික නැවත ලබාදීමට කටයුතු කරන ලෙසත් ඒකාබද්ධ ගුරු සේවා සංගමය අගමැතිවරයාගෙන් වැඩි දුරටත් ඉල්ලා තිබේ.
