දේශීය

කොරෝනා රෝගීන්ගේ ජීවිත බේරන්න සහය වෙන වෙද නිපැයුමක් – හෙද මහතකුගෙන්

ලෝකය පුරා වසංගතයක් බවට පත්ව තිබෙන කොරෝනා වෛරසයෙන් මිනිස් ජීවිත බේරා ගැනීම සඳහා සෞඛ්‍ය උපකරණ වල පවතින හිඟය දිනෙන් දින වැඩිවෙමින් පවතින වාතාවරණයක, එකවර රෝගීන් හතරකට කෘත්‍රීම ස්වසනය ලබාදිය හැකි ශ්වසනාධාරකයක් නිර්මාණය කිරීමට ශ්‍රී ලාංකික හෙද නිලධාරියකු සමත්ව ඇතැයි වාර්තා වේ.

සෞඛ්‍ය හා දේශීය වෛද්‍ය සේවා, කාන්තා හා ළමා කටයුතු සහ සමාජ ආරක්ෂණ අමාත්‍යාංශය ප්‍රකාශ කරන පරිදි මෙම නිර්මාණය කර ඇත්තේ මහනුවර මහ රෝහලේ හෘද ශල්‍ය දැඩිසත්කාර ඒකකයේ හෙද නිලධාරි බිහාන් හපුතන්ත්‍රි විසිනි.

හෙද නිලධාරි බිහාන් හපුතන්ත්‍රි

එකවර රෝගීන් හතරකට කෘතිම ස්වසනය ලබාදිය හැකි එම වෙන්ටිලේටර් යන්ත්‍රය අප්‍රේල් 2 බ්‍රහස්පතින්දා සෞඛ්‍ය හා දේශිය වෛද්‍ය සේවා අමාත්‍ය පවිත්‍රා වන්නිආරච්චිට හදුන්වාදීම සෞඛ්‍ය අමාත්‍යාංශයේ දී සිදු වී ඇත.

නිර්මාණයේ හිමිකරු එහිදී පෙන්වා දී ඇත්තේ කොරෝනා වෛරසය ආසාදිතයන්ගේ පෙනහළු ක්‍රියාකාරීත්වය අක්‍රීය වීම හේතුවෙන් කෘතිම ශ්වසන යන්ත්‍ර යොදා ගෙන ප්‍රතිකාර සේවා සිදු කළ යුතු බවයි.

නමුත් ප්‍රමාණවත් තරම් කෘතිම ශ්වසන යන්ත්‍ර නොමැතිවීම නිසා විදේශ රටවල ජනතාවගේ ජිවිත අහිමිවීමට හේතුවක් වු බව ඔහු එහිදී අවධාරණය කර තිබේ.

රුපියල් ලක්ෂ 40 ක් පමණ වන කෘත්‍රීම ශ්වසන යන්ත්‍ර ශ්‍රී ලංකාව තුල 500 ක පමණ ප්‍රමාණයක් තිබුනත් කොරෝනා රෝගීන් සඳහා ඒවායින් ප්‍රයෝජනයට ගත හැකි වන්නේ යන්ත්‍ර 300 ක් වැනි ප්‍රමාණයක් බව සෞඛ්‍ය හා දේශීය වෛද්‍ය සේවා, කාන්තා හා ළමා කටයුතු සහ සමාජ ආරක්ෂණ අමාත්‍යාංශයේ මාධ්‍ය ලේකම් විරාජ් අබේසිංහ විසින් මාධ්‍යයට නිකුත් කළ නිවේදනයක සඳහන්ය.

විෂබීජ පැතිරීම නෑ

මෙම නව නිර්මාණය අනුව එක් කෘත්‍රීම ශ්වසන යන්ත්‍රයකින් රෝගීන්ට විෂබීජ පැතිර නොයන පරිදි රෝගීන් හතරකට කෘතිම ශ්වසනය එකවර ලබාදිය හැකි බැවින් දැනට රෝහල්වල තිබෙන 500 ක් වන කෘත්‍රීම ශ්වසන යන්ත්‍ර සංඛ්‍යාවෙන් ලබාදෙන සේවාව 2000 දක්වා ඉහළ නැංවිය හැකි බවට මාධ්‍ය ලේකම් සහතික වෙයි.

ඒම නිසා හදිසි තත්වයකදී මෙම ක්‍රමවේදය මගින් රෝගීන්ට ඔක්සිජන් ලබාදීමට විශාල පහසුවක් වනු ඇති බව ඔහුගේ විශ්වාසයයි.

මෙම නව නිර්මාණය නිසා රජයට විශාල මුදලක් ඉතිරි වන බවද බිහාන් හපුතන්ත්‍රී එහිදී අමාත්‍යවරියට අවබෝධකර දී තිබේ.

එම අවස්ථාවට රජයේ හෙද නිලධාරීන්ගේ සංගමයේ සභාපති සමන් රත්නප්‍රිය, සෞඛ්‍ය ලේකම් භද්‍රානි ජයවර්ධන, අතිරේක ලේකම් සුනිල් ද අල්විස්, නියෝජ්‍ය අධ්‍යක්ෂ ජනරාල් ලාල් පනාපිටිය ඇතුලු පිරිසක් සහභාගී වී ඇත.

මේ අතර, ලෝකය පුරා වසංගතයක් බවට පත්ව තිබෙන කොරෝනා ‌‌වෛරසයට බිලිවූ රෝගීන්ට ප්‍රතිකාර කිරීම සඳහා යොදා ගතහැකි රොබෝ යන්ත්‍රණයක් නිර්මාණය කිරීමට ඇඹිලිපිටිය ජනාධිපති විද්‍යාලයේ 10 වැනි වසරෙහි ඉගෙනුම ලබන තේජන දෙවිමින ශිෂ්‍යයා සමත්ව ඇති බව පසුගියදා මාධ්‍ය විසින් වාර්තා කර තිබුණි.

Tags

Leave a Reply

Your email address will not be published. Required fields are marked *

සබැඳි ලිපි

Back to top button
Close