අවුරුදු කන්න රාජ්‍ය සේවකයින්ට ණයක්
පවතින කොවිඩ් වසංගත තත්ත්වය තුළ අභියෝග රැසකට මුහුණ දී සිටින රාජ්‍ය සේවකයින් සඳහා එළඹෙන උත්සව සමය වෙනුවෙන් පරිපූරක උත්සව ණය යෝජනා ක්‍රමයක් ක්‍රියාත්මක කිරීමට රජය කටයුතු යොදා තිබෙන බව රාජ්‍ය සේවා, පළාත් සභා සහ පළාත් පාලන අමාත්‍යාංශය නිවේදනය කරනවා.
නත්තල හා 2021 නව වසර සැමරීම වෙනුවෙන් ලබා දෙන මෙම පරිපූරක උත්සව ණය යෝජනා ක්‍රමය 0.625% ක පොලී අනුපාතයක් යටතේ මාස 10 කින් ගෙවීමට යටත් වන පරිදි ලබා දීමට නියමිතයි.
මසකට ආදායම රු. 50,000.00 කට වැඩි රාජ්‍ය නිලධාරීන් සදහා රු. 50,000.00 ක ණය මුදලක් ද රු. 25,000.00 ත් රු.50,000.00 ත් අතර වැටුප් ලබන නිලධාරීන් සඳහා රු. 25,000.00 ක ණය මුදලක් ද මේ යටතේ හිමිවේ. එසේම මසකට රු. 25,000.00 කට අඩු වැටුප් ලබන රාජ්‍ය නිලධාරීන් සඳහා රු. 10,000.00 ක ණය මුදලක් ද මෙම ණය යෝජනා ක්‍රමය යටතේ ලබා ගැනීමට හැක.
ලංකා බැංකුව, මහජන බැංකුව, ජාතික ඉතිරි කිරීමේ බැංකුව හා ප්‍රාදේශීය සංවර්ධන බැංකුව යන බැංකු මගින් මෙම ණය සහන ලබා දීමට නියමිත අතර අදාල රාජ්‍ය ආයතන වල ප්‍රධානීන් මගින් ණය අයදුම් කරන නිලධාරීන්ගේ නාම ලේඛන සේවාස්ථානය අසල පිහිටි රාජ්‍ය බැංකු වෙත ඉදිරිපත් කිරීමෙන් මෙම ණය මුදල ලබා ගැනීමට ඉඩකඩ ලබා දී ඇත.
අදාල ණය මුදල දෙසැම්බර් මස 18 වන දිනට පෙර ඉල්ලුම්කරුවන්ගේ ගිණුම් වලට බැර කිරීමට කටයුතු යොදා ඇත.
ජනාධිපති ගෝඨාභය රාජපක්ෂගේ මග පෙන්වීම යටතේ රාජ්‍ය සේවා පළාත් සභා හා පළාත් පාලන අමාත්‍ය ජනක බණ්ඩාර තෙන්නකෝන්ගේ උපදෙස් මත මෙම ණය යෝජනා ක්‍රමය ක්‍රියාත්මක කිරීම සඳහා වන චක්‍ර ලේඛය අමාත්‍යාංශ ලේකම් ජේ.ජේ. රත්නසිරිගේ අත්සනින් යුතුව නිකුත් කොට ඇත.
කොවිඩ් වසංගත තත්ත්වය තුළ රටේ සාමාන්‍ය ජන ජීවිතය යතා තත්ත්වයට පත් කරලීම සදහා කැපවී කටයුතු කළ සෞඛ්‍ය, ආරක්ෂක, පොලිස් ආදී වූ සේවාවන්හි නියුතු සමස්ත රාජ්‍ය සේවයට මෙම ණය යෝජනා ක්‍රමය යටතේ සහන ලබා දීමට රාජ්‍ය සේවා අමාත්‍යාංශය අදාළ චක්‍ර ලේඛය මගින් උපදෙස් ලබා දී ඇත.
