ශ්‍රී ලංකාවට “ඓතිහාසික” ටෙස්ට් ජයක්
සත්කාරක දකුණු අප්‍රිකානු ක්‍රිකට් කණ්ඩායම කඩුලු අටකින් පරාජය කරමින් ශ්‍රී ලංකා කණ්ඩායම දෙවන ටෙස්ට් තරගය ද ජයග්‍රහණය කළේය. ඒ අනුව දෙරට අතර තරගාවලියේ ජය ශ්‍රී ලංකාවට හිමි වුණේ තරග 2-0 ක් ලෙසිනි.
ඒ සමගම දකුණු අප්‍රිකානු ටෙස්ට් ක්‍රිකට් කණ්ඩායමක් එරට තුළදී ටෙස්ට් තරඟාවලියකින් පරාජය කළ ප්‍රථම ආසියානු කණ්ඩායම බවට ශ්‍රී ලංකා කණ්ඩායම පත්විය.
අද (පෙබ 23) පොර්ට් එලිසබෙත් හි පැවති දෙවන තරඟය ජය ගැනීම සඳහා ලකුණු 197ක ඉලක්කයක් හඹා ගිය ශ්‍රී ලංකා කණ්ඩායම කඩුලු දෙකක් පමණක් දැවී අවශ්‍ය ලකුණු ගණන ලබා ගත්තේය.
කුසල් මෙන්ඩිස් නොදැවී ලකුණු 84ක් ලබාගත් අතර ඕෂධ ප්‍රනාන්දු ලබාගත් ලකුණු සංඛ්‍යාව 75කි.
ඔවුන් දෙදෙනා තෙවන කඩුල්ල වෙනුවෙන් එක් කළ ලකුණු සංඛ්‍යාව 163කි.
තරඟයේ ප්‍රථමයෙන් පන්දුවට පහරදුන් දකුණු අප්‍රිකානු කණ්ඩායම ලකුණු 222ක් රැස් කළ අතර ඊට පිළිතුරු ලෙස ශ්‍රී ලංකා ක්‍රීඩකයෝ ලකුණු 154 කට දැවී ගියහ.
ඉන්පසු දක්ෂ පන්දු යැවීමක නිරත වූ සුරංග ලක්මාල් සහ ධනන්ජය ද සිල්වා සත්කාරක දකුණු අප්‍රිකානු කණ්ඩායමේ දෙවන ඉනිම ලකුණු 128 කට සීමා කළහ.
තරඟයේ දෙවන දිනය නිමාවන විට ශ්‍රී ලංකා කණ්ඩායම කඩුලු දෙකක් දැවී ලකුණු 60 ලබා සිටියේය.
Congratulations again @OfficialSLC for making history for Sri Lanka and Asia with this win. @IamDimuth @CHathurusinghe @KusalMendis1 @NiroshanDikka
— Kumar Sangakkara (@KumarSanga2) February 23, 2019
මේ ජයග්‍රහණය සම්බන්ධයෙන් ට්විටර් පණිවිඩයකින් නිකුත් කළ හිටපු ක්‍රිකට් නායක කුමාර් සංගක්කාර, ශ්‍රී ලංකාවට මෙන්ම ආසියාවට ද ඓතිහාසික ජයක් ගෙන එම වෙනුවෙන් කණ්ඩායම සුබ පතන බව පැවසීය.
Ayubowan Sri Lanka. So many seniors missing. Yet @OfficialSLC are the first Asian team to win a series in South Africa. One of the toughest places to win. Impossible really is nothing. My guy @RusselArnold69 will be dancing in the streets as will many in Sri Lanka👏🏻👏🏻👏🏻
— Ian Raphael Bishop (@irbishi) February 23, 2019
ප්‍රවීණ ක්‍රිකට් විස්තර විචාරක හා හිටපු බටහිර ඉන්දීය කොදෙව් වේග පන්දු යවන්නෙකු වූ ඉයන් බිෂොප්, ජ්‍යෙෂ්ඨ ක්‍රීඩකයින් රැසකගෙන් තොරව වුවද, ජය ගැනීම අසීරු බිමක මෙවන් ජයක් ලද පළමු ආසියානු කණ්ඩායම වීම ගැන ශ්‍රී ලංකා පිලට සුබ පැතුම් එක් කළේය.
