වසර 41කට පසුව යාපනය ගුවන්තොටුපොළ යලිත් ශ්‍රී ලාංකිකයන්ට
යාපනය, ජාත්‍යන්තර ගුවන් තොටුපොළ ජනාධිපති මෛත්‍රීපාල සිරිසේනගේ ප්‍රධානත්වයෙන් අද විවෘත කෙරිණි.
සාමාන්‍යයෙන් යාපනය අවට වැසියෙකුට විදේශගතවීම සඳහා කටුනායක ජාත්‍යන්තර ගුවන්තොටුපළට පැමිණීමට කිලෝමීටර් 400ට වැඩි පැමිණිමට සිදුවන අතර එයට පැය 8ක පමණ කාලයක් ගත කිරිමට සිදුවේ.
එම තත්ත්වය ඉදිරියේ වෙනස් වීමට නියමිත වන්නේ ඉන්දියාවේ ගමනාන්ත කරා වූ ගුවන් ගමන් යාපනය සිටම ක්‍රියාත්මක කිරීමට ඇති සුදානම හේතුවෙනි. ඒ අනුව දේශීය ගුවන් ගමන් සඳහා යොදාගන්නා යාපනය පලාලි ගුවන් තොටුපළ අද විවෘත වීමත් සමගින් ශ්‍රී ලංකාවේ තුන්වැනි ජාත්‍යන්තර ගුවන්තොටුපළ ලෙස හැඳින්විය හැකිය.
“යාපනය ජාත්‍යන්තර ගුවන්තොටුපළ” ලෙස නම් කර ඇති මෙම පලාලි ගුවන්තොටුපළ, රුපියල් බිලියන 3ට ආසන්න මුදලක් වැය කරමින් ජාත්‍යන්තර ගුවන්තොටුපළක් ලෙස වැඩිදියුණු කොට තිබේ. එයාර් ඉන්දියා ගුවන්සමාගමට අයත් කලාපීය ගුවන් සේවාවක් වන එලායන්ස් එයාර්හි විශේෂ ගුවන් යානයක් මංගල ගුවන් ගමන සිදුකළේය.
ජාත්‍යන්තර ඉයාටා (IATA) ගුවන් සමාගම් කේත අනුව යාපනය ජාත්‍යන්තර ගුවන්තොටුපළ JAF ලෙස හැඳින්වීමට නියමිතය. යාපනය ගුවන්තොටුපළ 1960 සහ 1970 දශකවල යාපනය සහ චෙන්නායි නගර අතර විනාඩි 45කින් යා හැකි ගුවන් සේවයක් තිබී ඇති අතර එය පසුව ආරක්ෂක හේතුන් මත නවතා දැමිණ.
ඉන්පසු යාපනයේ පලාලි ගුවන්තොටුපළ ආරක්ෂක අංශ යටතේ ක්‍රියාත්මකවූ අතර යාපනය සහ කොළඹ අතර ගුවන් ගමන් සඳහා එම ගුවන්තොටුපළ යොදා ගැනිණි.
මෙම ගුවන්තොටුපළ සංවර්ධනයට ආයෝජනය කෙරෙන සම්පුරුණ මුදල රුපියල් මිලියන 2250ක් වන අතර එයින් රුපියල් මිලියන 300ක් ඉන්දියාව ආධාරයක් ලෙස සපයා තිබේ. අදියර තුනක් යටතේ ක්‍රියාත්මක වන මෙම මෙම ව්‍යාපෘතියේ පළමු අදියර දැනට අවසන් කර ඇති අතර ඒ සමඟම ආසන 80ට අඩු ගුවන් යානා එහි හැසිරවීම සිදුවේ.
ව්‍යාපෘතියේ දෙවැනි අදියරේ දී ප්‍රධාන ධාවන පථය කිලෝ මීටර් 1.5 දක්වා අලුතින්ම ස්ථාපණය කිරිමත් සමගින් විශාල ගුවන්යානා මෙහි ගොඩබෑමට හැකියාව සැලසෙනු ඇත.
ඉන්දියාවේ චෙන්නායි, ට්‍රිචි සහ කෝචි යන නගරවලට යාපනයේ සිට සතියකට ගුවන් ගමන් තුනක් ඇරඹීමට එලායන්ස් එයාර් සමාගම දැනට එකඟවී තිබේ. ඉදිරි ගුවන් ගමන් ඒ සඳහා ඇති ඉල්ලුම අනුව වැඩි කිරිමට සැලසුම් කර ඇත.
ශ්‍රී ලංකාවේ යාපනය සිට දකුණු ඉන්දියාව දක්වා ගුවන් ගමන් යළි ආරම්භවීමෙන් ඉන්දු – ශ්‍රී ලංකා සම්බන්ධතාවල නව පරිච්ඡේදයක් ආරම්භයක් විය හැකි බව ඉන්දිය මාධ්‍ය වාර්තා පවසයි.
මෙම ගුවන්තොටුපළ ජාත්‍යන්තර ගුවන් ගමන් සඳහා විවෘත වීම ගැන සතුට පළකරමින් උතුරේ ජනතාව සමාජ මාධ්‍යවල විවිධ අදහස් පලකර තිබේ. මේ වන විට සැලසුම් කර ඇති මඩකලපුව ජාත්‍යන්තර ගුවන්තොටුපළ විවෘත කළ පසු මඩකලපුව සිට චෙන්නායි දක්වා ගුවන් සේවයක් ක්‍රියාත්මක කිරීමට එලායන්ස් එයාර් කැමැත්ත පළකර ඇත.
