දේශීය

විශ්ව ශක්තියෙන් ලෙඩ වැඩිකළ දීගොඩ කුමාර රිමාන්ඩ්

විශ්ව ශක්තියෙන් තමාට රෝගීන් සුව කළ හැකි බව කියූ දීගොඩ කුමාර මේ මස 31 වැනිදා දක්වා රක්ෂිත බන්ධනාගාර ගත කිරීමට කැස්බෑව මහෙස්ත්‍රාත් රුචිර වැලිවත්ත ඊයේ (23) නියෝග කළා.

පිළියන්දල මධ්‍ය මහා විද්‍යාලයේ සංවිධානය කළ සුව කිරීමේ මෙහෙයකදී එම විද්‍යාලයේ සිසුවකුට තිබූ පාන් පිටි ආසාත්මිකතාවක් සුවකරන බව පවසා පාන් කෑමට ලබාදීමෙන් පසු එම ශිෂ්‍යා දැඩි ලෙස රෝගාතුර වී දැඩි සත්කාර ඒකකයේ ප්‍රතිකාර ලැබුවා.

මෙම සිදුවීමට අදාළ පිළියන්දල පොලිසිය මගින් දීගොඩ කුමාරට විරුද්ධව නඩු පවරා තිබු අතර පසුගිය 08 වැනිදා කැස්බෑව මහෙස්ත්‍රාත්වරයා දීගොඩ කුමාර වහා අත්අඩංගුවට ගන්නා ලෙස පොලිසියට නියෝග කළා.

ඊට අදාළව මෝසමක් ඊයේ (23) දීගොඩ කුමාර විසින් ඉදිරිපත් කළ අතර දීගොඩ කුමාර වෙනුවෙන් පෙනී සිටි ජනාධිපති නීතිඥ නවරත්න බණ්ඩාර, නීතිඥ අනුර හෑගොඩ, නීතිඥ ඩෙරික් සමරසේකර ඇතුළු නීතිඥයන් පිරිස දිගින් දිගටම අධිකරණයට කියා සිටියේ දීගොඩ කුමාරට විරුද්ධව ඇති මිනී මැරීමට තැත් කිරීමේ චෝදනාව වැරදි සහගත බවයි.

එහෙත් පැමිණිල්ල වෙනුවෙන් පෙනී සිටි ජ්‍යෙෂ්ඨ නීතිඥ නිරූපා සේරසිංහ සහ ජ්‍යෙෂ්ඨ නීතිඥ තරංගමාලා ගමගේ අධිකරණයට කරුණු දක්වමින් අදාළ ශිෂ්‍යයා තමාට පාන්පිටි ආසාත්මිකතාවක් ඇති බව පැහැදිලිවම කියා සිටියදී දීගොඩ කුමාරගේ අනුදැනුම මත ඔහුට පාන් ආහාරයට ලබාදීම විශාල වරදක් බව කියා සිටියා.

පැමිණිල්ලේ කරුණු දැක්වීම් අවසානයේ කරුණු දැක්වූ මහෙස්ත්‍රාත්වරයා දරුවාට පාන් ආහාරයට ගැනීමට පෙලඹවීමක් දීගොඩ කුමාර සිදු කර ඇති බැවින් ඉදිරියටත් මෙවන් සිදුවීම් වීමේ අවදානමක පවතින බව ප්‍රකාශ කර දීගොඩ කුමාර රක්ෂිත බන්ධනාගාරගත කරන ලෙස නියෝග කළා.

දීගොඩ කුමාර වෙනුවෙන් පෙනී සිටි ජනාධිපති නීතිඥ නවරත්න බණ්ඩාර කරුණු දක්වමින් පැවසුවේ තම සේවාදායකයා වන දීගොඩ කුමාරට මීට පෙර අධිකරණයට පැමිණීමට නොහැකි වූයේ ඔහුගේ මව ජනවාරි 02 වැනි දින සිට 16 වැනිදා දක්වා කොළඹ පෞද්ගලික රෝහලක ප්‍රතිකාර ලබමින් සිටි නිසා බවයි.

ජනවාරි 18 වැනි දින විත්තිකරුගේ මව මිය ගිය බවද අධිකරණයට කරුණු දක්වමින් ඔහුගේ නීතිඥයෝ සඳහන් කළා.

මහෙස්ත්‍රාත්වරයා තීන්දුව ප්‍රකාශයට පත් කළ අවස්ථාවේ දීගොඩ කුමාර නමැත්තා සිහිසුන්ව බිම ඇද වැටුණු අතර එම අවස්ථාවේ ඔහු පෞද්ගලික රෝහලකට රැගෙන යාමට ඔහුගේ නීතිඥයන් කළ ඉල්ලීම මහෙස්ත්‍රාත්වරයා ප්‍රතික්ෂේප කළා.

Leave a Reply

Your email address will not be published. Required fields are marked *

සබැඳි ලිපි

Back to top button