“යුද්ධ කරපු විදියට වසංගත මර්ධනය කරන්න බෑ…. ඒක තේරුම් ගන්න”

“පළමු දේශීය රෝගියා හඳුනාගත් දා සිට ගතවූ මුල්ම දවස් හතේ අවසානය ඉතාලිය සමග සංසන්දනය කළ විට ඉතා නරක තැනකට වැටී සිටින ශ්‍රී ලංකාව ලෝක සෞඛ්‍ය සංවිධානය විසින් යෝජනා කර ඇති දැඩි පියවර අනුගමනය නොකරන්නේ නම් කෝවිඩ්-19 අලුත් අවුරුද්දේ උච්චස්ථානයක් කරා ලඟා වනු ඇතැයි අපේක්ෂා කළ හැකියි”

යැයි GMOA නිවේදනයක් පවසා තිබේ.

විදේශවල සිට පැමිණි පිරිස් වාසය කරන බවට සැක කෙරෙන පිරිස් අල්ලා ගැනීමේ අරමුණින් පුත්තලම, මීගමුව හා හලාවත ඇතුළු වයඹදිග කලාපයට 18 රාත්‍රියේ පනවන ලද ඇඳිරි නීතිය යුද හමුදාව විසින් පසුදා උදෑසන ඉවත් කර ඇත්තේ වසංගත රෝග විශේෂඥයන්ගේ විමසීමකින් තොරව බව GMOA සංවිධානය චෝදනා කරයි.

“ඊයේ දවසේ හවස 4 ට පුත්ලම දිස්ත්‍රික්කයේ හා මීගමුව ප්‍රදේශය පොලිස් ඇඳිරි නීතිය දාලා වහනවා. අද උදේ 8 ට පොලිස් ඇඳිරි නීතිය ඉවත් කරලා ඒ අයට ඕන තැනක යන්න දෙනවා. මේක වසංගත රෝග විද්‍යනුකූල ක්‍රමවේදය. මේකද සෞඛ්‍ය අංශ වල නිර්දේශය. අඩුම තරමේ කොහෙන්ද මේ තීන්දුව ආවේ. අද උදේ 8 ට මේ ඇඳිරි නීතිය ඉවත් කරන්න කවුද තීන්දුව ගත්තේ. ඊයේ දවසේ හවස 4 ට මෙහෙයුම් මධ්‍යස්ථානයේ හමුදාපති තුමා එක්ක සාකච්ඡාවක් තිබ්බා ඒකෙ තමයි තීන්දු තීරණ ගන්නේ. එතනදි කිසිසේත්ම තීරණය කළේ නෑ අද(19) උදේ 8 ට ඉවත් කරන්න….”

යැයි ලේකම් හරිත අලුත්ගේ කොළඹදී මාධ්‍යවේදීන් හමුවේ ඊයේ(19) කියා සිටියේය.

ආසාදන අවදානමක් ඇති පුද්ගලයන් හඳුනා ගත් බවට සහතිකයකින් තොරව ඇඳිරි නීතිය ඉවත් කර ඇත්තේ කොරෝනා රෝගීන් සංඛ්‍යාව 50 දක්වා ඉහළ ගොස් ඇති ශ්‍රී ලංකාවේ රෝග ව්‍යාප්තිය වලක්වාලීමේ අධිකාරිය සිවිල් පරිපාලනයක් යටතට පත් කිරීමේ අවශ්‍යතාව මුල් පෙලේ වෘත්තීය සමිති රැසක් විසින් අවධානයට යොමු කර දිනට පසු දාය.

කෙසේ වෙතත්, පුත්තලම දිස්ත්‍රික්කයට මෙන්ම මීගමුව පොලිස් කොට්ඨාසයේ කොච්චිකඩේ පොලිස් බල ප්‍රදේශයට 19 බ්‍රහස්පතින්දා හවස 2.00 සිට නැවත වරක් පොලිසිය විසින් ඇඳිරි නීතිය පැනවීය.

එදිනම රාත්‍රී 10.00 සිට නැවත දැනුම් දෙන තුරු වත්තල හා ජා-ඇල පොලිස් බල ප්‍රදේශයන්ට ද පොලිස් ඇඳිරි නීතිය පනවා ඇත.

“සමාජයක් විදියට රටක් විදියට අපි තේරුම් ගත යුතුයි ත්‍රස්තවාදය මර්දනය කිරීම සහ ගෝලීය වසංගතයක් මර්දනය කිරීමේ වෙනස. ඒ වෙනස තේරුම් ගන්නෙ නැතුව අපිට ඉස්සරහට යන්න බැහැ.”

යැයි වෛද්‍ය හරිත අලුත්ගේ අවධාරණය කළේය.

යුද කලාපයේ රෝහල්වලට බර අවි ප්‍රහාර එල්ල වෙද්දී ඒවායේ සේවය කළ තම සංගමයේ සාමාජිකයන්ගේ ආරක්ෂාව වෙනුවෙන් පෙනී නොසිට මහින්ද රාජපක්ෂ පාලනයට සහාය දැක්වූ බව GMOA වෙත එල්ලවී තිබෙන බරපතල චෝදනාවකි.