‘පොහොට්ටු තොරණ හිස මතට කඩා වැටී’ සදාකාලිකව ආබාධිත වූ තරුණියගේ කඳුළු කතාව
එවකට විපක්ෂ නායකවරයාව සිටි මහින්ද රාජපක්ෂ පිළිගැනීම සඳහා මහරගම නගරයේ ඉදිකරන ලද අනවසර තොරණක් කඩා වැටීමෙන් බරපතල තුවාල ලද තරුණිය සදාකාලිකව ආබාධිත තත්ත්වයට පත්ව කිසි දිනෙක ඇවිදීමට නොහැකිව අසරණ භාවයට පත් වි සිටියි. මේ අතර, තොරණ ඉදිකිරීමට වගකිව යුතු අය දැන් ඔවුන්ට එරෙහිව නීතිමය ක්‍රියාමාර්ග නොගන්නා ලෙස තර්ජනය කරන බවට වින්දිතයා චෝදනා කරයි.
ගාල්ල, රත්ගම සුලාරි ලක්නීමා (27) පසුගිය වසරේ සැප්තැම්බර් 8 වන දින මහරගමට පැමිණ ඇත්තේ මැලේසියාවට යාමට අවසන් සූදානම සඳහා රැකියා ඒජන්සිය වෙත යාමටය. ඇය පමුණුව දෙසට ගමන් කරමින් සිටියදී තොරණ හදිසියේම පාරට වැටී ඇය ඊට යටවිය. වැඩිදුර ප්‍රතිකාර සඳහා ඇයව කළුබොවිල ශික්ෂණ රෝහලට සහ පසුව ජාතික රෝහලට ඇතුළත් කෙරිණ.
ශල්‍යකර්මයෙන් පසු ඇයව රාගම රක්තවාතවේද සහ පුනරුත්ථාපන රෝහල වෙත ගෙන ගිය අතර එහිදී ඇය මාස තුනකට ආසන්න කාලයක් රැඳී සිටියාය.
මහරගම ශ්‍රී ලංකා පොදුජන පෙරමුණේ සංවිධායක කාන්ති කොඩිකාර සහ ඇගේ සැමියා වන බස්නාහිර පළාත් සභා මන්ත්‍රී උපාලි කොඩිකාර මහතාගේ ආධාරකරුවන් විසින් මෙම තොරණ ඉදිකර තිබේ. මහරගම නගර සභාවේ අනුමැතියකින් තොරව මෙම තොරණ සකස් කර ඇති අතර සිද්ධිය සම්බන්ධයෙන් මහරගම පොලිසිය විසින් නඩු පවරා ඇත. කොඩිකාර මහතා ඇප මත සිටින අතර නඩුව පෙබරවාරි 28 වනදා නැවත විභාගයට ගැනේ.
“ඔවුන් මාව ඉක්මනින්ම රෝහලෙන් පිටත් කරාවි, නමුත් මම නිවසේ ජීවත් වන්නේ කෙසේදැයි මම දන්නෙ නැහැ. අපි ජීවත් වෙන්නේ මගේ අම්මා, මම සහ මගේ සහෝදරිය සමඟ විවාහ වූ කුඩා නිවසක. මගේ රෝද පුටුව ගෙනයාමට ඇතුළත ඉඩක්වත් නැහැ. නිසි වැසිකිළියක්වත් නැහැ” යනුවෙන් ඇය සන්ඩේ ටයිම්ස් පුවත්පතට පවසා තිබේ.
තමාට සහ මවට කුඩා නිවසක් තැනීම සඳහා ප්‍රමාණවත් මුදලක් උපයා ගැනීම සඳහා විදේශගත වීමට සැලසුම් කර තිබුණු බව සුලාරි පැවසුවාය. “මට ඇයව රැකබලා ගැනීමට අවශ්‍ය වුණා. නමුත් ඇය විසින් මා රැකබලා ගත යුතු බැවින් ඇයට දැන් ඇගේ රැකියාවත් අහිමි වෙලා”
සුලාරිගේ මව එස්.එම්. සමන්තිකා (49) ට මාස පහකට පෙර සිදු වූ අනතුරෙන් පසු නිරන්තරයෙන් තම දියණියගේ අසළ සිටීමට සිදුවීම නිසා රත්ගම ඇඟලුම් කම්හලක රැකියාව අහිමි විය. “අපි මැතිවරණ සමයේ දින පහක් පමණ ආපසු ගෙදර ගියා. නමුත් සුලාරිගේ ශරීරයට විෂබීජයක් ඇතුල් වෙලා නැවතත් රෝහල්ගත වෙන්න සිදුවුණා.”
රෝහලේ ජීවිතය ඔවුන්ට දුෂ්කර බව සමන්තිකා මහත්මිය පැවසුවාය. “අපි අපේ ආහාර පිටතින් මිලදී ගත යුතුයි. ඖෂධ, පැම්පර්ස් සහ කොලෝන් වැනි දේ මිලදී ගත යුතුයි. මේ සියල්ල සඳහා මසකට රුපියල් 50,000 ක් පමණ වැය වෙනවා.”
ඛේදවාචකය සිදුවූ විගසම කාන්ති කොඩිකාර සහ උපාලි කොඩිකාර යන දෙදෙනාම ඇය බැලීමට ගොස් මුදල් යවා ඇති නමුත් දැන් ඔවුන් ක්‍රියා කරන්නේ ‘සියල්ල අමතක වී’ ඇති ලෙසින් බව සුලාරි පැවසීය.
“අපි හැමතිස්සෙම ඒ අයට කතා කරලා අපේ දුක කියන්න ඕනෙ. ඔවුන් දෙසැම්බර් මාසයේදී රුපියල් 10,000 ක් සහ ජනවාරි මාසයේදී රුපියල් 15,000 ක් එවලා තියෙනවා…. නමුත් අවස්ථා දෙකේදීම අපට හුඟක් කෝල් ගන්න සිද්ධ වුණා. ඔවුන් දැන් අප බැලීමටවත් එන්නෙ නැහැ. මෙහෙම උනොත් වන්දි ලබා ගැනීම සඳහා ඔවුන්ට එරෙහිව නඩු පැවරීමට සිදුවන බව මම මෑතකදී ඔවුන්ට පැවසුවා. එහෙනම් එහෙම කරලා බලමුකො කියලා ඒගොල්ලො මට තර්ජනය කළා.”
මෙම සිදුවීමට කොඩිකාර මහත්මිය පෞද්ගලිකව වගකිව යුතු බව සුලාරි පැවසුවාය. ඇයගේ නම සහ මුහුණ ඇය මතට කඩා වැටුණු තොරණ මත කැපී පෙනෙන ලෙස ප්‍රදර්ශනය විය.
ජනාධිපති ගෝඨාභය රාජපක්ෂට, අගමැති මහින්ද රාජපක්ෂට හෝ ඔවුන්ගේ පක්ෂයේ වෙනත් කිසිවෙකුට මේ සම්බන්ධයෙන් අපි දොස් කියන්නෙ නැහැ. අපට අවශ්‍ය වන්නේ අපගේ දුක්ඛිත තත්ත්වයෙන් මිදීමයි.
ශ්‍රී ලංකා පොදුජන පෙරමුණේ මහරගම සංවිධායක කාන්ති කොඩිකාර මහත්මිය අවධාරණය කළේ ඔවුන් සුලාරි වෙනුවෙන් තමන්ට හැකි සෑම දෙයක්ම කරන බවයි. වින්දිතයා සහ ඇගේ පවුලේ අය ‘තමන්ගේ දේශපාලන සතුරන් විසින් ඔවුන්ගේ අභිමතාර්ථයන් සඳහා හසුරුවනු ලබන බව’ ඇය කියා සිටියාය.
“අපට හැකි විට අපි ඔවුන් බැලීමට ගියා, නමුත් නියෝජිතයන් ලෙස අපට විශාල වැඩ කොටසක් තියෙනවා, ඒ නිසා අපට හැමදාම ඒක කරන්න බැහැ. තොරණ ගැහුවෙ වෙනත් අය නිසා අපට අත පිහදාගෙන අහක බලන්න තිබුණා. නමුත් මගේ ස්වාමිපුරුෂයා වගකීම භාරගත්තේ අප අන් අයට දොස් පවරන්න ඕන නැති නිසයි. ”
සුලාරි සහ ඇගේ පවුලේ අයට බලපෑම් කිරීමට තමන්ට අවශ්‍ය නොවන බව පැවසූ ඇය පවුල වෙනුවෙන් තමන්ට හැකි සෑම දෙයක්ම කරන බව අවධාරණය කළාය.
කෙසේ වෙතත්, සුලාරි කියා සිටියේ අනතුරෙන් පසු කොඩිකාර මහත්මිය තමා බැලීමට පැමිණ ඇත්තේ එක් වරක් පමණක් බවත්, කොඩිකාර මහතා දෙවරක් එසේ කර ඇති බවත්ය. “මට අවශ්‍ය දේ මට සාධාරණයි. ජනාධිපතිතුමා මේක දැකලා මැදිහත් වනු ඇතැයි මම බලාපොරොත්තු වෙනවා.” යැයි සුලාරි පවසා සිටියා ය.
