විශේෂාංග

කිතුනු මළමිනිවලින් පොහොට්ටු දේශපාලනය කරන කාදිනල්

රජයේ ඔත්තු සේවා දුර්වල කළ බවට කාදිනල් හිමි කියන කතාවද අලූත් කතාවක් නොව රාජපක්‍ෂලාගේ පරණ නිර්මාණයකි.

කාදිනල් මැල්කම් රංජිත් පියනමට ඇත්ත අභියෝගයක් තිබේ. ඒ පාස්කු ඉරිදා ප‍්‍රහාරය නිසා, සිය ආගමේ නිර්මාතෘ දෙවියන් ගැන ආගමේ භක්තිමතුන්ට ඇතිවී තිබෙන අවිශ්වාසය හා කලකිරීම සමනය කිරීමයි.

විශේ්ෂයෙන් මීගමුව, කටුවපිටිය ආසන්න ව ජීවත්වන, පාස්කු ඉරිදා ප‍්‍රහාරයේදී ජීවිත අහිමිවීම්, තුවාල ලැබීම් හා අනෙකුත් විවිධ අතවරයන්ට මුහුණ දුන් කතෝලික ජනතාවගෙන් සමහරුන්, තමන් මුහුණ දුන් ඒ අතෝරයන්ගෙන් මුදාගැනීමට දෙවියන් වහන්සේ අසමත්වීම නිසා ඇතිවූ කලකිරීමත්, කතෝලික ආගම කෙරෙහිත් එහි නිර්මාතෘ දෙවියන් ගැනත් ඇති විශ්වාසය පළුදුවීමත් නිසා, සුරුවම් වන්දනාව අත්හැරීම, පල්ලියට යෑමෙන් වැළකීම, ආගමික කටයුතුවලින් ඉවත්වීම වැනි ප‍්‍රතිචාර දක්වන බව ආරංචි වෙයි. ඇත්ත වශයෙන්ම, කාදිනල්වරයා, මේ ප‍්‍රහාරය වැළැක්වූයේ නැත්තේ ඇයිදැයි ඇසිය යුත්තේ තමාගේ දෙවියන්ගෙන්මය. මේ භක්තිමතුන් පාස්කු ඉරිදා, කටුවපිටිය හා අනෙකුත් පල්ලිවලට ආවේ යේසුන් වහන්සේගේ උත්ථානය සැමරීම සඳහාය. තම දිව්‍ය පුත‍්‍රයාගේ මරණයෙන් මතු උත්ථානය සැමරීමට තමාගේම ශුද්ධ භූමිය වූ පල්ලියට පැමිණි භක්තිමතුන්, සිය ගණනක් සැණෙකින් ඝාතනයට ලක්වීම දෙවියන් වහන්සේට වළක්වා ගන්නට ඉඩ නොතිබිණිද? නැතිනම්, ඔවුන් එසේ ඝාතනය වීම දෙවියන් වහන්සේගේ කැමැත්ත වීද? ඔවුන් ස්වර්ග රාජ්‍යය වෙත, ‘ප‍්‍රාණ පරිත්‍යාගීන්’ හැටියට එකතු කර ගැනීම දෙවියන් වහන්සේගේ අභිලාෂය වීද?

මිනිසුන් හැකි ඉක්මනින් තමා වෙත කැඳවාගැනීම දේව කැමැත්ත නම්, ඔවුන් ප‍්‍රාණ පරිත්‍යාගීන් නම්, එනිසාම ඔවුන් සාන්තුවරුන් බවට පත්වී ඇති නම්, ඔවුන් වියෝවීම නිසා දුකට, සන්තාපයට පත්විය යුත්තේ ඇයි? ජීවත්වනවාට වඩා හොඳ තත්ත්වයක් ලබාදීමට දෙවියන් ඔවුන් ස්වර්ගය වෙත කැඳවාගත් විට, ඒ වෙනුවෙන් දුක් මෙහෙය පැවැත්විය යුත්තේ ඇයි? ඒ දුක උත්කර්ෂයට නැංවිය යුත්තේ ඇයි? මේ ප‍්‍රශ්න, ‘නිරාගමිකයන්ගේ සාහසික ප‍්‍රශ්න’ ලෙස පැත්තකට දැමිය හැකි නමුත්, මෙවැනි විනාශයකින් පසු, විශේෂයෙන් කවර හෝ ආගමක සිද්ධස්ථානයක් තුළ වුණු මෙවැනි විනාශයකින් පසු, එවැනි ප‍්‍රශ්න මතුවීම සාධාරණය.

එනිසා, පල්ලියට පැමිණි ඒ බැතිමතුන් සිය ගණනට මිය යෑමට සැලැස්වීම, දෙවියන් කෙරෙහි වන භක්තිය අභියෝගයට ලක් කරන්නේද? උත්තරය ‘ඔව්‘ ය.

කාදිනල්වරයා එක අතෙකින් මුහුණදී සිටින්නේ තම ආගම කෙරෙහි වියැකී ගොස් ඇති මේ භක්තිය පිළිබඳ ප‍්‍රශ්නයට පිළිතුරු දිමේ දුෂ්කර තත්ත්වයටය. ඇත්ත වශයෙන්ම ඊට දිය හැකි සාධාරණ පිළිතුරක් නැත. ඒ නිසා, ඊට වෙනත් පිළිතුරක් ලබාදීම අවශ්‍යය. ඔහුගේ් පිළිතුර වන්නේ, මේ විනාශය වළක්වාගත හැකිව තිබුණු (දෙවියන් හැරුණු කොට* වෙනත් අය (මිනිසුන්* සිටින බවත්, ඔවුන් සිය වගකීම හරිහැටි නොකිරීම නිසා විනාශය වුණු බවත්ය.

ලාංකික කිතුනු ජනතාවගේ නායකයා බවට ස්වයං උත්කර්ෂයෙන් පත් සිටින (ඔහු ලංකාවේ කිතුනු ජනයාගේ එකම නායකයා නොවේ. කොළඹ පදවියේ රදගුරු වන ඔහු අනෙක් පදවිවල සිටින රදගුරුවරුන් අතර සමානයෙකි. ඒ ඒ පදවියේ බලය ඇත්තේ ඒ ඒ පදවියේ රදගුරුටය. එනිසා ඔහු කතෝලික නායකයන් අතර එක් කෙනෙකි. එකම වෙනස නම්, ඍජුවම වතිකානුවෙන් ලැබෙන කාදිනල් පදවියක් ඔහුට හිමිවී තිබීමයි. කාදිනල් පදවිය ලබන්නන් සුවිශේෂ වන නමුත්, ඔවුන්ට විශේෂ ආගමික හා සිවිල් බලයක් ලැබෙන නමුත්, අත්‍යවශ්‍යයෙන්ම ඔහු කතෝ්ලික ජනතාවගේ එකම නායකයා නොවේ. රදගුරු පදවිය දැරීමට කාලසීමාවක් තිබේ. එහෙත්, වතිකානුවෙන් ඍජුවම ලැබෙන කාදිනල් තනතුර දිවි ඇති තෙක් දැරිය හැක්කකි. පාප් වහන්සේ කෙනකු පත්කිරීමේදී කාදිනල්වරයකුට ඡුන්දයක් හිමිය.* මැල්කම් රංජිත් පියනම, සිය අනුත්තර නායකයා හැටියට පිළිනොගන්නා කිතුනු ගිහි පැවිදි දෙකොටසම හැමදා සිටි අතර, මේ වන විට ඔහුගේ හැසිරීම ගැන බලවත් විවේචනයක් දක්වන කතෝලික භක්තිවන්තයන්ගේ ගණන වැඩිවෙමින් තිබේ

ඊට බලපා ඇත්තේ, කාදිනල් මැල්කම් රංජිත්ගේ දේශපාලන ප‍්‍රකාශයි. ආගමික නායකයන්ට දේශපාලන ප‍්‍රකාශ කළ නොහැකියැයි කිසිවෙකු කියන්නේ නැත. එහෙත්, එවැනි ගෞරවයට පත්වූවකු, කිසිම පදනමක් නැති, ආධානග‍්‍රාහී, පාක්‍ෂික, සමහර විට සිය ආගමික සංස්ථාවේ ප‍්‍රතිපත්තිමය කාරණාවලට පවා එරෙහි, කරුණු හැටියටත් වැරදි දේ කියන කරන විට ඒ හැසිරීමේ මූලය කුමක්දැයි සොයාබලන්නට සිදුවීම සාධාරණය. ඒ විදියට කාදිනල් හිමි කියන කරන දේ සලකන විට, බැලූබැල්මට පෙනෙන්නේ, ඔහුගේ කටින් පිටවන්නේ පොහොට්ටුවේ හෙවත් මහින්ද රාජපක්‍ෂලාගේ හඬ බවයි.
කටුවාපිටිය දේවස්ථානය නැවත ආගමික මෙහෙය සඳහා විවෘත කිරීමෙන් පසු කාදිනල්වරයා කළ කතාව, කිසිවකු විසින් ඔහුට කඩපාඩම් කරවූවාක් වැන්න. මනුවර්ණ එසේ කියන්නේ, ඔහු පොතක් බලාගෙන එහි ඇති දේ කියවූ නිසා නොවේ. ඔහුගේ අදහස්, මෙවැනි මොහොතකදී වෙනත් කාටවත් කියන්නට වුවමනා වී තිබුණු දෙයක් කාදිනල්ගේ කටින් කියවූවාක් වැනි හැඩයක් පෙනෙන නිසාය.

ඔහුට අනුව, ‘රටේ දැන් සිටින නායකයන්ට කොන්ද පණ නැත. මේ පිරිස කොන්ද පණ ඇති පිරිසකට පාලන බලය ලබාදී ගෙදර යායුතුය.’ පාස්කු ඉරිදා ප‍්‍රහාරය සමග නායකයන්ගේ කොන්දේ ඇති සම්බන්ධය කුමක්ද? කොන්ද පණ ඇති නායකයෝ සිටියෝ නම්, දෙවියන් වහන්සේටවත් වළක්වාගත නොහැකි වුනු පාස්කු ප‍්‍රහාරය වළක්වාගත හැකිව තිබුණිද? නායකයන්ට කොන්ද පණ නැති නම්, සර්ව බලධාරී දෙවියන් වහන්සේට, ඒ වගකීම භාරගෙන සිය බැතිමතුන් මරණයෙන් වළක්වා ගත හැකිවී නොතිබුණිද?

දැන් ඉන්නේ කොන්ද පණ නැති නායකයන් බව අලූතෙන් කිව්වේ කාදිනල් හිමි වුණත්, හැමදාම එය කියන්නේ රාජපක්‍ෂලාය. (රාජපක්‍ෂලාගේ කොන්දේ ඇති පණ ගැන, අත්තිඩියේදී ඝාතනය කෙරුණු ලසන්ත වික‍්‍රමතුංගගේ පටන්, රතුපස්වලදී ඝාතනය කෙරුණු අහිංසකයන් තිදෙනා, යාපනයේදී ඝාතනය කෙරුණු නිමලරාජන් හරහා කටුනායකදී ඝාතනය කෙරුණු රොෂේන් චානක දක්වා පිරිස විසින් කියා දී තිබේ. ලසන්ත කතෝලිකයෙකි. රතුපස්වලදී හමුදාව, ආරක්‍ෂාව පතා දිවගිය අහිංසකයන්ට එලව එලවා පහරදුන්නේ, වෙඩි තැබුවේ, වැලිවේරිය කතෝලික පල්ලියේ දේව මණ්ඩපයටත් හානි කරමිනි. රොෂේන් චානකත් කතෝලිකයෙකි. ඒ රාජපක්‍ෂ භීෂණ කාලයේ කාදිනල් රංජිත්ගේ කටට මෙවැනි පණක් තිබුණා අප දැක නැත.* එනයින්, කාදිනල් හිමිගේ කටින් ආවේ අන් කිසිවක් නොවේ, රාජපක්‍ෂලාගේ හඬය.

මෙම කාටූනයේ මුල් අයිතිය මෙහි නිර්මාණකරු සතුය

රාජපක්‍ෂලාගේ පණ ඇති කොන්ද ගැන හොඳින් දන්නා රටට, කුමන වැරදි ඇතිවා වුණත්, දැන් ඉන්නා පන්නයේ නායකයන් ලැබීම වාසනාවකි. ඔවුහු ජාතිවාදියෝ නොවෙති. ආඥාදායකයෝ නොවෙති. කාදිනල් හිමිගේ සිහින නායකයන් පිරිස අපේ‍්‍රල් 21වැනිදා වන විට බලයේ සිටියේ නම්, එදිනෙන් පසු ආරම්භ වීමට නියමිතව තිබුණේ රජය විසින් අනුදක්නා ලද, පහසුකම් සපයන ලද හා ආරක්‍ෂාව සපයන ලද මහා මුස්ලිම් සංහාරයකි. මුල් අවස්ථාවේදී සහජීවනය ගැන දෙසූ කාදිනල් හිමි පසුව මීගමුවේදී මුස්ලිම් විරෝධී සැකසංකා ඇතිවන ආකාරයෙන් කතාකළ හැටි කවුරුත් දනිති. අදටත්, කතෝලික පල්ලියේ පාදිලිවරුන් මුස්ලිම් විරෝධයක් තම පල්ලිය හරහා පතුරන බව ප‍්‍රසිද්ධ ඇත්තකි. පෙර කී ආකාරයේ මුස්ලිම් සංහාරයක් සිදුනොවන තැනට වැඩ සැලසීම ගැන ස්තුතිවන්ත විය යුත්තේ දෙවියන්ට නොවේ. 2015 දේහපාලන වෙනස ඇතිකළ ජනතාවටය. ඊට දායකවූ නායකයන්ටය.

රජයේ ඔත්තු සේවා දුර්වල කළ බවට කාදිනල් හිමි කියන කතාවද අලූත් කතාවක් නොව රාජපක්‍ෂලාගේ පරණ නිර්මාණයකි. පාස්කු ප‍්‍රහාරය වුණේ ඔත්තු අංශවල දුර්වලතාවක් නිසා නොවන බව සාමාන්‍ය සිහිබුද්ධියක් තිබෙන, සාධාරණ ලෙස හිතන ඕනෑම කෙනෙක්, අඩු ගණනේ මේ වන විට දනිති. ඒ ගැන තේරුම් ගැනීමට අවශ්‍ය කරුණු කාරණා මේ වන විට මහජන පරිමණ්ඩලයේ ඕනෑ තරම් තිබේ. එසේ තිබියදී, මාස තුනකට පසුවත්, ඔත්තු සේවා දුර්වල කිරීමක් ගැන කාදිනල්වරයා මතුරන්නේ, ඔහුට සිහිබුද්ධිය අහිමිවීමෙන් නොවේ. රාජපක්‍ෂ අගතීන්ගෙන් හිස පිරී ඇති බැවිනි. කාදිනල්වරයා මේ කරන්නේ, ඊළඟ ජනාධිපතිවරණය දක්වා යන පොහොට්ටු දේශපාලනය පෝෂණය කිරීමකක් මිස අන් කුමක්ද?

අනෙක් අතට, පාස්කු ප‍්‍රහාරයේ වගකීම පැහැර හැරීම ගැන සොයන්නට මේ වන විට පරීක්‍ෂණ කිහිපයක්ම පැවැත්වෙයි. ජනාධිපතිගේ කමිටුව මූලික සෙවීම කළ අතර, දැන් පාර්ලිමේන්තු කාරක සභාවක් ඒ ගැන පරීක්‍ෂා කරයි. ඒ අතර නීතිපතිවරයාගේ නියමය පරිදි, අපරාධ පරීක්‍ෂණ දෙපාර්තමේන්තුව කළ විමර්ශන අනුව, අපරාධමය වශයෙන් වගකිව යුතු පුද්ගලයන් අත්අඩංගුවට ගෙන අධිකරණයට ඉදිරිපත් කර තිබේ. ඒ අතර, මූලික අයිතිවාසිකම් පෙත්සම් කිහිපයක්ද විභාග වෙයි. රටේ සාමාන්‍ය නීතිය හා අධිකරණ පද්ධතිය ඇතුළේ ගතහැකි උපරිම ක‍්‍රියාමාර්ග මේ ආකාරයෙන් ගෙන තිබේ. කාදිනල් රංජිත් කියන්නේ මේ කිසිවකින් තමා සෑහීමට පත්නොවන බවයි. ඉතින් ඔහු සෑහීමට පත්කළ හැක්කේ යළිත් බලයට ගෙන ආවොත්, රාජපක්‍ෂවරුන්ටම පමණකි.

අයිසිස් නායකයා පිටරටක ජීවත්වන බවටද කාදිනල් හිමි එහිදී බොරුවක් කීවේය. ඒ ජාතිවාදය වපුරන ‘දිවයින’ පුවතක් මත පිහිටාය. මේ ප‍්‍රහාරය කළවුන් හා අයිසිස් සංවිධානය අතර සම්බන්ධයක් නැති බවත්, තමන් සංවිධානයක් හැටියට පිළිගන්නා ලෙස සහරාන් ප‍්‍රමුඛ කල්ලිය අයිසිස් සංවිධානයෙන් ඉල්ලා තිබුණු නමුත් ඊට ප‍්‍රතිචාර ලැබී නොතිබුණු බවත්, පාර්ලිමේන්තු කාරකන සභාව ඉදිරියේ සාක්‍ෂි දුන් අපරාධ පරීක්‍ෂණ දෙපාර්තමේන්තුව භාර ජ්‍යෙෂ්ඨ නියෝජ්‍ය පොලිස්පති රවි සෙනෙවිරත්න කීවේය. එවැනි තත්ත්වයක් තිබියදී, පිටරටක ඉන්නා අයිසිස් නායකයකු ගැන කාදිනල් හිමිට දිව්‍ය ඥානයක් පහළ වුණේ කෙසේද? ඒ ඥානය අපේ‍්‍රල් 21 වැනිදාට පෙරත් ප‍්‍රයෝජනයට ගෙන, පාස්කු ඉරිදා දේව මෙහෙයයන් නවත්වා මේ විනාශය වළක්වාගත හැකිව තිබුණේ කාදිනල් හිමිටම නොවේද?

එක්සත් ජාතීන්ගේ සංවිධානය ගැන, මානව අයිතිවාසිකම් ගැන ඔහු කියන දේ, හුදෙක් නොදැනීම නිසා කියන ඒවා නොවේ. රෝමයේම නැවතී සිට බයිබලය හොඳින් හදාරා, ලෝකයට විවෘතවී ඇති, භාෂා හයකට වැඩි ගණනක් දන්නා කාදිනල්වරයා, ජාත්‍යන්තර සම්බන්ධතා ගැන හොඳින් දනියි. එහෙත් දැන්, ලෝකයේ කවුරුත් දන්නා ඇත්ත, ලංකාවේ අහිංසක නොදැනුවත් මිනිසුන් ඉදිරියේ නැත්ත බවට පත්කරමින් සිටියි. ඒ ඔහුගේ ජීවිතයෙන්ම කැපවී ඇති බව පෙනෙන රාජපක්‍ෂවරුන් බලයට ගෙනඒමේ ව්‍යාපෘතිය මුදුන් පමුණුවා ගැනීම සඳහාය.


anidda.lk ඇසුරින්

Tags

Leave a Reply

Your email address will not be published. Required fields are marked *

සබැඳි ලිපි

Back to top button